شفافيات
الحر والرطوبة مومهمة مادام المرتبات تشبع والاسعار مافيها غضب الله
ما قصروا ما قصروا ! الله يخليهم الحبايب اللي  وثق  فيهم الشعب , ووقفوا طوابير تحت كل الظروف لانتخابهم لمجلس الأمة أعضاء...
 ما قصروا أعضاء المجلس الخماسيني " الموقر"  حلوا كل المشاكل وما كان عندهم مع المعضلات أي "شناكل"ما كو شي تعلق حق الدورة القادمة!
المرتبات زادت بنسب كبيرة والناس صارت راضية عن عيشتها ! والغلاء الله لا يبارك في المحتكرين لأقوات الناس, الغلاء زال وصرنا أرخص دولة في العالم.
 الحر والرطوبة مو مهمة ما دام المرتبات تشبع والأسعار ما فيها غضب الله.
 تصوروا إن كيلوا اللحم الضاني العربي الكويتي اللي مو موكلينه أهله أكياس إسمنت وحشائش الملاعب الرياضية أم "......" تصوروا إن الكيلو صار بنصف دينار ? وأما اللحم الاسترالي اللي يايبينه علشان ناكله وأهو أصلا مربينه علشان صوفه, تصوروا إن سعره بثلاثمائة فلس ووايدة عليه لو صج... ها اللحم يصلح حق أكل الكلاب ويمكن تعافه..
اللحم الأسترالي في استراليا بس ودك تطالع لونه, في الكويت لونه أسود  بس يمكن من الذنوب, الذنوب تسود  الويه. عمركم شفتوا خروف ويهه أسود إلا عندنا?
 أما أسعار الخضار والفواكه وضروريات الحياة اليومية فالأسعار بالفلسات بس المشكله اللي واجهت الناس إن البنوك ما تصرف فلسات!
 ما قصروا راعين البشوت الكحيلين الأيواد النشامى.
والحكومة "الحبيبة" ما قصرت مع المجلس ما بقت حيلة ومكر إلا واستخدمتها لصالح إنها تمشي القوانين والمشاريع اللي  هي لصالح البلاد والعباد, عضوات المجلس ما كانوا ينامون الليل وما يدرون الله وين حاطهم! العضوات المحترمات ما دوروا إعلام ولا شهرة, وشو بدهن بهيده كله, العضوات ما لقطوا كلام ربعهم القدامى ورددوه بإسمهم أبدا ابدا, واللي يقوله الرئيس تطلع باجر وحده كلينتونية المظهر وتقول: إحنا راح نسوي ونسوي تعيد كلامه لكن بإسمها علشان ما كو شغل وما كو انتاجية فكرية إلا عندهن.
الكهرباء يا الله من فضلك التوربينات يشهد على منظرها ويضحك مولانا جحا, يا بوها, وقطوها في الصحراء  موعارفين شلون يدخلونها حق أماكنها الجسور ما تتحملها وما كو شوارع تتسع لعرباناتها بعد, هذا من تخطيط جحا وإلا شحقه ميت من الضحك جحا? ويقولون إن فيها عملية نهب جبيرة وايد! يقولون, يقولون.. جحا شبع ضحك على التوربينات!
 أعزائي ما أدري شسالفة أمك ثم امك ثم أمك اللي رددها الأعضاء المحترمين في المجلس, موسب طبعا لا ترى الأعضاء ما يعرفون السب ! لكن ترى اللي يدش المجلس يمكن شوية يتعلم السب.
 بس ودي أسأل "شو هيدي وعلى لغة أهل القلمون, شو هودي الفحم المكلسن ?ولو أنا نفسي ماني فهمان عليها شو هوي المكلسن شو هوي?"
كاتب كويتي
shfafya50@hotmail.com