"الحكومة حاطة دوبها دوب المواطن المسكين اللي صار ماله قيمة ببلده"

قال الرجل : "الله ياهو مسلسل اللي شفته البارح للرائع ياسر العظمة على احدى القنوات العربية اللي ماهي محلية, المسلسل يدور حول ضيعة ابطالها المختار ومن ضمن شعبه واحد اسمه صالح , والضيعة نظامها قديم وعلى قولة اهل الايام هذي ناس رجعيين, كانو اهل الضيعة وارثين من اجدادهم طريقة المشي للخلف يعني على ظهورهم" , قال الشايب : "لاحول الله وليش يمشون بهالطريقة ", قال الرجل :"حجتهم ان الدواب من غنم وحمير تمشي لقدام ومايصير انهم يمشون مثلها" , قال المعاق : "شنهو هالضيعة مابها احد يعترض او يثور", قال الرجل : "اللي تقول عنه صار بيوم من الايام عندما اكتشف صالح طريقة المشي لقدام بعد عدة محاولات تخللها كم طيحة لما اجاد المشي" , قال الخبير : "اللهم صل على كامل النور حلوه حكايتك ودي ماوردتش عليا مع اني ماخليت مكان مارحتوش" , قال الشاب : "خلوه يكمل قصته المشوقة" , قال الرجل : "احسنت يابو الشباب" ... المهم بطلنا صالح دش الضيعة بمشيته الجديدة وعلى طول طار الخبر للمختار اللي ثار على صالح واتهمه بالزندقة وهو يردد خوش جملة وهي من تمنطق تزندق .. وحكم عليه ام الرجوع عن هذا الامر اللي يخالف عاداتهم وتقاليدهم او انه يترك الضيعة .. وعندها غادر صالح الضيعة واستوطن البر وبعد فترة زاد عدد اهل الضيعة عند صالح وثارت الاعتصامات والمظاهرات على المختار الديكتاتوري اللي اعدم كم واحد معارض وهو يصيح وين سياسة احترام الاجداد راحت عنكم .. انتم ناسين ان الخطر يجي من قدام .. لكن عمك اصمخ زاد عدد المعترضين لين قويت شوكة المنفيين اللي على طول دخلوا الضيعة بطريقة مشي الاوادم الصجية, ومن هاليوم صار الناس بالضيعة يمشون عدل .. وخلصت وملصت وجت الدجاجة وعنفصت , قال الخبير : "ااه ماتقول كدا من الصبح انا فهمت المقصود انت شايف حاجات بالبلد مش عجباك وليها الشبه مع المشي اللي قلت عنه بحكايتك" , قال الرجل: "عندك حق وخذ مثل على هذا بالبلد الحكومة حاطة دوبها ودوب المواطن المسكين اللي صار ماله قيمة ببلده وخير مثال لجنة الازالات اللي قامت تخرب اللي يعمره المواطن من اشجار وغيره" , قال الشايب : "انتم ناسين مشاكل الكهرباء اللي قامت تضرب اطنابها بالشتاء والصيف والكلام عن قطع مبرمج , قال المعاق : وخوذوا عندكم مشاكل اهل العاشرة اللي يعانون من غازات المصانع اللي حواليهم" , قال الشاب : وسالفة اهل مشرف مع محطتهم اللي عندهم وبعد سالفة مضخة المي مع اهل الصليبخات واحدث سالفة وهي سالفة الحكومة مول اللي يبون يسوونها بالجهراء لان حسب علمي ان الموظفين بالسنترال يداومون بأدوار فيها بطاريات شركات الهواتف النقالة وهذا يعارض شغل لجنة الازالة اللي قامت تخالف اعمدة هالشركات بمناطق الكويت , قال الخبير : وفيه حكاية اجد منها وهي حكاية اهل جنوب السرة (يارب قلتها صح) اللي بنوا بيوتهم بموافقة البلدية تحت اعمدة الضغط العالي .. ويوم الناس اشتكت قامت وزارات الدولة ترمي التهم على بعضها البعض .. وكمان حكاية بعض الصحف اللي كل يوم والثاني تكتب ان الحكومة حتدي عشرة آلاف دينار مش عارف لمين مرة لرب الاسرة ومرة للمتقاعد ومرة مش عارف لمين لما كرهناكم وقلنا بأنفسنا ان شاء الله مايخدوش حاجة , الاصوات متعالية معترضة على السطر الاخير للخبير .. وفي هذي الاثناء رفع على مسامعنا الشيخ زغلول اذان الظهر .
كاتب كويتي*
bofahad42@hotmail.com